Nýi utanlands á ferðinni

Síðasti hluti ferðalagsins

2004-07-14T12:42:00.000Z

Föstudagur 18. júní:
Allir nokkuð snemma á fótum þennan daginn. Léttur morgunmatur og svo lagt í hann til Örebro. Í Örebro er að finna Gustavsvik, vatnagarðinn sem var nefndur í gær. Þegar við vorum búin að koma okkur vel fyrir þar þá náttúrulega fórum við á vatnasvæðið og sulluðum þar í sundlaugum úti og inni og renndum okkur í rennibrautum. Svo eigum við von á Gunna bróður Gudda, hann ætlar að skreppa til okkar frá Stokkhólmi, horfa með okkur á leik Svía og Ítala í EM. Símon kemst því miður ekki. Hann er í fríi með Júlíu systur sinni í Frakklandi, en hefði átt að vera hér í Örebro að keppa með fótboltaliðinu sínu.
Bræðurnir, Gunni og Guddi, og Einar líka, hugfangnir yfir leik Svía og Ítala í EM. Leikurinn endaði held ég ca. 1:1, held ég (aftur). En ég er alveg viss um að Slatan skoraði alveg rosalega flott mark fyrir Svía!!

Laugardagur 19. júní:
Rigndi mikið í nótt, veður þungbúið, það má eiga von á meiri rigningu í dag. Alls ekki heitt, eiginlega hálf kalt, allir í peysum, síðbuxum og jökkum. Löbbuðum í bæinn og skoðuðum hluta af höll; þar var í gangi sýning nemenda í listaskóla úr bænum. Allskonar myndir, málverk, ljósmyndir o.fl. Skoðuðum líka eina kirkju en það eru átta kirkjur í ekki stærri bæ. Við rétt sluppum til baka áður en rigningin tók við. Strákarnir þrír, Guddi, Einar og Gunni fóru í sund og gufu en ég settist niður með bók, skrapp í búðina til að kaupa í matinn. Ég notaði bara tímann til að klára að jafna mig í bakinu eftir bankaúttektina (bakverkurinn var eitthvað semgerðist mjög skyndilega og óvænt akkurat þegar ég var að troða seðlunum í budduna eftir úttekt í hraðbanka; ætli ég hafi tekið of mikið út?) og þess vegna var bara gott að liggja með bókina og slappa af á meðan ég klára að jafna mig af þessu og það er alveg komið núna.
Það voru örugglega tveir fótboltaleikir í kvöld en ég man alls ekki lengur (þetta er skrifað fjórum dögum seinna) hvað lið spiluðu þá.

Sunnudagur 20.júní:
Gunni kvaddur á fótboltavelli í nágrenni tjaldstæðisins okkar í Örebro þegar við lögðum í’ann áfram og nú í vestur og norðvestur í átt til Noregs. Veðrið enn ekki skemmtilegt, rigning í nótt sem leið og það er bara alltaf kveikt á miðstöðinni!!
Og svo var bara keyrt og keyrt í rigningu og skúrum og aðeins meiri skúrum og stundum hellirigningu.
Fiskevik camping skammt norðan við Arvika í Svíþjóð. Mjög notalegt, lítið stæði við vatn þar sem var tekið vel og heimilislega á móti okkur af frúnni á bænum. Henni fannst t.d. skemmtilegt að við vorum fyrstu Íslendingarnir sem hún hafði tekið á móti.

Mánudagur 21.júní:
Heja Norge!
Ennþá rignir. Öllum þykir nú frekar kalt. Moelv, Gudbrandsdal í Noregi, Stenvik camping og hyttegrend ( eða hytta í grennd ).
Gamalt stæði og má muna sinn fífil fegurri. Einhverntíma hefur nú verið gaman að nota sundlaugina á bökkum Mjösa og róa bátunum og synda í vatninu. Þetta er núna allt hálf tómt, úr sér gengið og í niðurníðslu, við sváfum nú samt mjög vel.

Þriðjudagur 22. júní:
Færðum okkur um ca. 30 km. í morgun og komum hingað til Hunderfossen í Gudbrandsdalen um hádegi. Veður bara nokkuð bjart og hlýrra en marga undanfarna daga. Eftir að við höfðum komið okkur fyrir var að sjálfsögðu hjólað í skemmtigarðinn. Þar skoðuðum við safn eða sögu um hvernig Norðmenn virkja og framleiða rafmagn; skemmtilegt og fróðlegt. Þarna eru nú líka raftingbátar, skurðgröfur og ýmis skemmtitæki þannig að Einar fékk líka sinn skammt af skemmtun.
Skyldi verða sól á morgun? Þannig að við getum og nennum að vera hér og dunda okkur; skoða bobsleðabrautina sem var notuð á Ólympíuleikunum 1994, skoða ‘Vegasafn’ sem við vitum nú ekki alveg hvað inniheldur.
Það er nú spáð betra veðri um helgina og vonandi gengur það eftir og helst svo áfram. Það er víst ekki eftir nema u.þ.b. tvær vikur af ferðinni. Rosalega er tíminn fljótur að líða.
Svíþjóð-Danmörk í EM í fótbolta er í sjónvarpinu í kvöld, rosalega spennandi (meira spennandi fyrir suma en aðra , það er nú bara eins og alltaf).
Bjarkirnar eru alveg rosalega falleg tré hér í Noregi og líka vestast í Svíþjóð, þar sem við fórum um.

Miðvikudagur 23. júní:
Erum á leiðinni til Unnar systur hans Gudda. Ætlum að koma þangað á fimmtudagskvöld og eyða þar helginni. Hættum við að fara héðan í dag, splæstum annari nótt. Fórum á söfn í dag. Norska vegasafnið og norska fjallsprengisafnið (apsolutly bein þýðing). Hér er safnað saman vélum og verkfærum sem hafa verið notuð i vegaframkvæmdir og vegavinnu. Mikið af þessum vélum er utandyra og maður gengur á milli tækja og véla og líka gamalla húsa þar sem bjuggu vegaeftirlitsmenn og vegavinnumenn. Alls kyns skúrar og hýbýli manna frá því fyrst var byrjað á vegavinnu. Í innisafni er svo meira um sögulegu hliðina.
Og svo ‘fjallsprengisafnið’, það var rosalegt. Norðmenn bjuggu bara til ‘lítil’ jarðgöng og sýna þar sögu jarðgangagerðar frá upphafi. Það er bæði vegagöng og virkjanagöng. Ýmsir munir fortíðar eru til sýnis í jarðgöngunum og einnig fjöldinn allur af sjónvarpsskjám með upplýsingum og frásögnum. Hreint út sagt glæsilegt safn.

Fimmtudagur 24. júní:
Akstursdagur. Keyrt norður Gudbrandsdal, yfir Dovrefjöll. Svei mér ef Noregur er ekki líkur Íslandi þegar maður er kominn í 1.000 metra hæð. Skemmtileg akstursleið þennan daginn.
Komum um sexleytið til Unnar systur Gudda á stórbýlinu Toven í Möre og Romsdal.
Grillaðar, reyktar svínakótelettur með ‘öllu’, algert nammi, í kvöldmatinn.

Föstudagur 25. júní:
Í sveitinni hjá Unni.
Jæja, Guddi kominn með í bakið. Eitthvað gamalt og kunnuglegt; ekkert nudd en lítið eitt af verkjalyfjum þáði hann við verkjunum. Annars rólegt, óðalsbóndinn ber skít á túnin skv. gamalli íslenskri venju. Allt frekar ‘gamaldags skv. íslenskri hefð’ hér í Noregi. Maurasýra í heyið; sem gerir vonda lykt verri, en þetta er nú allt saman eitthvað gamalkunnugt og fljótt að venjast. Íslendingarnir og Unnur eru ekki í sveitaverkunum; sitja bara á veröndinni eða í stofu og spjalla. Einar (óðalsbóndasonurinn) og Einar Helgi fara á fjórhjól eða horfa á sjónvarpið og leika sér. Svo er það bara aðeins að líta í fjósið á mjaltatímanum og að klóra hundinum henni Birtu eða kettinum henni Missy.

Laugardagur 26. júní:
Fórum í heimsókn til foreldra óðalsbóndans, Knut Toven, Knut er giftur systur Gudda, Unni. Þau búa í gamla húsinu á býlinu. Húsið er þó ekki allt jafn gamalt því það var byggt við það eftir því sem lifandi kynslóðum fjölgaði. Í þessu húsi eru tvær íbúðir. Pabbi Knuts tók á móti okkur og byrjaði á að sýna okkur ‘byggðasafn’ óðalsins. Lítið en þó ekki lítið safn muna sem gamli maðurinn hefur safnað saman.
Þar þykir merkast trjábolir sem voru sérstaklega til þess gerðir að draga eftir þeim skip víkinganna, Haralds hárfagra og þess konar manna. Þetta er timbur sem var lagt og í mýrina á árum forfeðra okkar þ.e. Haralds hárfagra og annarra frægra manna og fannst í mýrinni þegar átti að rækta mýrina og Toven vildi stækka túnin. ‘Kavleveien’ heitir þetta á norsku og hafa fundist brot af þeim hér og hvar um Noreg og þykja hinir merkilegustu fundir. Einnig fengum við að sjá á þessu heimilisbyggðasafni ýmis tól og tæki, t.d. tunnugerðartól, þvottavél, ljós o.fl. Meiriháttar safn og að það sé á heimili eins manns sem hefur safnað saman hlutum ættingja o.þ.h. er meiriháttar. ‘Stappuret’ er svo norskt fyrirbæri; það var sér hús, ‘búr’, sem er byggt á steinstöplum sem hindra mýs og önnur dýr í að komast í húsið sem geymdi korn, saltað kjöt o.fl.
Kvöldinu lauk með kaffiboði hjá eldri hjónunum. Eftir borðbæn sem var alveg ný upplifun í minni fjölskyldu var boðið upp á ‘Krom(n)kaker’ norsk kramarhús, sérstakar norskar jólakökur, steiktar í einskonar vöfflujárni, mjög þunnar með mynstri, og svo rúllaðar upp í kramarhús; æðislega góðar og fallegar. Svo var líka borið með niðursoðnir blandaðir ávextir og þeyttur rjómi með skrautsykri, algert æði.

Sunnudagur 27. júní:
Fórum í bíltúr með Unni og Knut, skoðuðum Mardalsfossen og Eikesdalen. Hrikalegt landslag, ævintýraljómi yfir því. Komum á heimili þar sem Björn Steinar Björnsson sat og samdi. Kannski varð norski þjóðsöngurinn til þar; hver veit hvað hann samdi hvar?
Jæja, Einar velti fjórhjóli býlisins en þeir frændur eru búinir að ferðast á því upp og niður brekkurnar hér síðustu daga. Þetta endaði vel, Einar er heill fyrir utan kúlu á höfðinu og rispur hér og þar um kroppinn og á hjólinu sá ekki eftir skellinn.

Mánudagur 28. júní:
Fórum frá Unni þegar nálgaðist hádegi. Enduðum daginn í Åndalsnes, í fallegu umhverfi og horfðum á Romsdalshornet og Tröllavegginn hrikalega. Glæsileg fjöll, svolítil þoka eða ský á sumum þeirra; þau eru nú 1500-1600 m. há þannig að það er nú ekki nema von að maður sjái ekki alla leið!! eða hvað; gæti skýjafarið kannski verið öðruvísi. Je minn, Polýanna er mætt á svæðið til að afsaka veðrið; það gæti nefnilega verið verra.

Þriðjudagur 29. júní:
Fengum loksins nothæft gas hjá Kroken Caravan í Åndalsnes; fimm stjörnur til Kroken Caravan.
Þvældumst yfir fjöll og fyrnindi, Trollstigen, hrikalegt og gaman. Skoðuðum hreindýrshorn, tröll og annars konar ‘husflid’; það er víst ‘handverk’ á íslensku.
Lentum í Geiranger eftir ferðina niður Örnevegen; stoppuðum aðeins í Örnesvingen (efsta beygjan af ellefu á veginum niður í fjörðinn) til að virða fyrir okkur útsýnið yfir Geirangerfjord; glæsilegt!

Miðvikudagur 30. júní:
Í dag er sólskin; við vorum nú búin að gleyma að sólin væri til en hún er bara boðin velkomin og við gerðum ekkert í dag nema sleikja sólina.

Fimmtudagur 1. júlí:
Fórum í útsýnisferð á báti um Geirangerfjord í dag. Skyggni gott en sólin fór snemma á bak við ský. Þessi fjörður er stórkostlegur, brattur og djúpur, fossar, klettar, alls kyns landslag og myndir; æðislegt. Og hér bjó fólk þótt það þyrfti að binda börnin sín í band til þess að varna því að þau hröpuðu fyrir björg, meðan skroppið var í fjósið eða fjárhúsin. Sama fólk slapp reynar líka við að borga skattinn þar sem ekkert var einfaldara en að draga stigann upp klettinn þegar sást til skattheimtumannsins! Hvort skyldi skatturinn hafa verið ósanngjarn eða bóndinn ekki átt fyrir skattinum, hm, ha.

Föstudagur 2. júlí:
Ræs um níu leitið í morgun. Morgunmatur og drífa sig. Veðrið ekki til neins. Ókum fjallveg, yfir Sognfjell sem liggur hæst í 1434 m. hæð yfir sjávarmáli. Það var slydda og rigning þarna þegar við fórum um, íshrafl og spangir í vötnum og þónokkuð um snjóskafla sem voru ekki enn bráðnaðir þótt langt sé komið fram á sumar. Enduðum þennan rigningarsudda-og þokudag í Lustrafjord, innfjörður Sognfjord, í Sogn og Fjordane. Lítið og vinalegt tjaldstæði í fjörunni þrátt fyrir stöðuga rigningu, hreinlega skvampar í grasinu þegar stigið er til jarðar og Íslendingarnir bara með sandala og töfflur (nei ekki rétt, ein stígvél eru með; keypt í Þýskalandi í fyrra!).

Laugardagur 3. júlí:
Búin að keyra stóran hluta Sognafjord. Allt í einu stóðum við frammi fyrir þeirri staðreynd að það eru eiginlega engin tjaldstæði við fjörðinn eftir að komið er framhjá innstu fjörðunum. Je minn, leit nú bara út fyrir að það þyrfti að keyra fjölmarga kíómetra til að komast í svefn. Enduðum á rennblautu stæði við sunnanverðan Sognafjord, greinilega búið að rigna heil ósköp; máttum leggja í bara polli, hreinlega¸leit nú ekki elskulega út. Við jöfnuðum okkur nú á því og pollurinn minnkaði aðeins. Annars var þetta skemmtilegt stæði niður í fjöru Sognafjarðar. Lengst út í sveit, tæplega fært þangað á ökutæki vegna þess hve vegurinn er mjór. Leigðum mótorbát og sigldum um fjörðinn í góða veðrinu. Einn er þó galli á gjöf Njarðar; helv.... flugnager; alveg örlitlar sem kitla mann allsstaðar og stungurnar minnsta kosti 27 og mig klæjar ferlega.

Sunnudagur 4. júlí:
Komum til Bergen eða Breistein sem er lítill bær utan við Bergen. Þræddum Sognafjord og flesta hans innfirði, í gær og í dag. Flestir eða allir innfjarðanna bera hver sitt nafn. Ægifagurt á að horfa og mishrikalegt. Maður er hreinlega hissa á því að Íslendingar séu að tala um að búa í ‘brattlendi’ og að á Íslandi séu ‘mjóir’ vegir; hlusta ekki á’ð’etta eftir þetta. Horfðum á Formúlu 1 og ætlum að horfa á úrslitaleikinn í EM í fótbolta í kvöld. Ætlum niður í borg á morgun, skoða Bergen.

Mánudagur 5. júlí:
Skoðuðum Bergen í dag eins og til stóð. Fallegur, gamall og skemmtilegur bær, fullur af lífi. Markaðurinn við höfnina er mjög skemmtilegur, sérstaklega fiskmarkaðurinn, þótt handverkið sé nú líka ánægjulegt. Við fórum líka í sjódýrasafnið sem er stórt og flott. Sáum þegar mörgæsunum og selunum var gefið að borða og á meðan útskýrði ‘matráðsmaðurinn’ og sagði frá einkennum og uppruna dýranna. Við ætluðum líka að sjá Tæknisafnið en uppgvötuðum eftir langan göngutúr að það er bara opið á sunnudögum milli kl. 14 og 17. Það var sem sé fýluferð en þó ekki, við bara sáum þeim mun meira af bænum.

Þriðjudagur 6. júlí:
Í dag er heimferðardagur. Við fórum í síðustu húsbílabúðina í þessari ferð og keyptum okkur útiljós á bílinn og grill. Síðan var það bara biðröðin á bryggjunni. Horfðum á Norrönu leggja að bryggju og farþega og farm fara frá borði. Norröna er stórt skip, stærra en ég hafði ímyndað mér. Herbergið frekar þröngt en rúmin góð og þetta bara mjög fínt. Það viðraði til að vera úti á dekki, samt betra að finna sér skjól fyrir vindinum, meðan siglt var út firði og milli eyja á leiðinni til hafs.
Kl. 2 í nótt verður komið til Leirvíkur á Shetlandseyjum. Við fórum út á dekk til að sjá myrkrið og bæjarljósin.

Miðvikudagur 7. júlí:
Á siglingu með Norrönu. Einar spilaði Bingó og við Guddi vorum aðstoðarmenn. Annars bara rólegt. Komið var til Þórshafnar kl. 15 og við fórum í land og gengum um bæinn þangað til við þurftum að skila okkur aftur um borð kl. 17:30.
Um kvöldið hlustuðum við á færeysku hljómsveitina Take off spila og syngja á Víkingaklúbbnum um borð í Norrönu.

Fimmtudagur 8. júlí:
Alltaf gott að koma heim. Norröna lagði að bryggju á Seyðisfirði kl. 8. Við vorum með þeim fyrstu út úr skipinu en máttum bíða þar til síðust með afgreiðslu. Biðin var u.þ.b. fimm klukkustundir. Þá var búið að útbúa tollskýrslu vegna innflutnings á ‘stóra utanlands’ og ganga frá greiðslu á vörugjaldi og virðisaukaskatti. Allir glaðir. Eftir íslenska hamborgaramáltíð á Egilsstöðum var ekið í einum rykk til Akureyrar, ekki einu sinni pissustopp, eftirvæntingin var svo mikil að komast heim.

Svona var nú ferðalagið okkar!

2004-07-04T20:54:00.000Z

Vá, nú er maður aftur kominn í ‘samband’.Þetta á eftir að verða langt blogg. Nú þegar hefur verið skrifuð sex blaðsíðna dagbók, sem er þó afskaplega götótt saga. En þess vegna verður þetta blogg gefið út í nokkrum pörtum ( enginn nennir nú að lesa 6 bls. af þessu rugli í einu, en kannski nenna því einhverjir með hléum). Ástæðan fyrir því að ekkert hefur frést af sígaunafjölskyldunni undanfarið er að það er engin GPRS-reikisamningur við Svía ( sem þýðir að ekki sé hægt að tengjast internetinu með gsm-símanum), hmm, skil nú ekkert í því, og eitthvað eru Norðmenn nú ekki með tæknina í lagi í öllum landshlutum. Á meðan geta þessir tæknivæddu Íslendingar, á ferðalagi utanlands, ekki gefið út bloggið sitt. Nú erum við ferðalangarnir komnir til Bergen, hér er GPRS-samband og hér kemur hluti af ferðasögunni.

Fimmtudagur 10.júní:
Karlrassgatið hann Kurt átti ekkert af vörunum sem við pöntuðum hjá honum í október 2003. Hann verður bara að gera svo vel og ‘eiga sig’ (gæti þýtt farðu rass og rófu, eða bíttu í ...ginn á þér eða eitthvað ennþá verra), við nennum bara alls ekki lengur að rembast við að fá að kaupa af manninum vörur ( skildu margir hafa kynnst því að biðja oft og lengi um að kaupmaður seldi manni vörur, og þá á ég við að mann vanti ákveðna hluti, jafnvel með vörunúmer á takteinum og að væntanlegur kúnni haldi á peningaseðlunum en sorry, það er svo mikið að gera hjá kaupmanninum svo mánuðum skiptir, að hann má ekki vera að því að panta hjá birgjanum sínum. Hnu og hnuss, nú er ‘væni’ kominn yfir þolmork.)
Vandel hjá Bjarna.
Jæja, allir nema Guddi fóru í Legoland. Guddi hræðilega slæmur vegna flugnastungna; þrjár stungur á vinstra fæti, niður undir ökkla og ein á baugfingri hægri handar, hann þvoði nú samt bílinn meðan hinir voru í Legolandi að skoða kubbabyggingar og annað. Ásta, Biggi, Sigga og Einar fóru í Legoland. Yndislegur dagur, mátulega heitt og mátulega margt fólk í Legolandi, gaman að ganga um í rólegheitum í Legolandi skoða ‘Miniland’ og fara í ‘Vatnasafari’ o.fl.
‘Schinken risotto a la Sigga’ í kvöldmat; þetta þýðir nú ‘soðin hrísgrjón, dönsk skinka úr dós, blandað saman með með fersku grænmeti og maísbaunum úr dós, allt blandað saman og brauð fyrir þá sem vildu; mjög lystugt, nokkuð gott, bara frábært.

Föstudagur 11. júní:
Keyrt frá Bjarna og Bryndísi, þeim íslensku í Vandel, til Malmö Svergie.
Verslað í Hundige Storcenter; maður verður nú að eiga í matinn!!
Ókum yfir hina miklu Eyrarsundsbú; óneytanlega mikið mannvirki. Byrjar með neðansjávargöngum, 4 km. og síðan 16 km. brú yfir hafið. Ótrúlegt, milli landa yfir hafið á einni brú. Eitthvað hefur nú maðurinn þróað með sér síðustu aldirnar.
Malmö skiluðum ‘gömlu hjónunum’ til frænda sinna. Ingimar frændi kom hlaupandi út á götu þegar hann sá þennan húsbíl keyra götuna, til að taka á móti gestunum. Þarna kvöddum við Bigga og Ástu og fórum á tjaldstæði í borginni.

Laugardagur 12. júní:
Malmö, Limhamn, tiltekt, hreingernig, stórþvottur í þvottahúsinu; vissi ekki fyrr að það gæti tekið 3 tíma, í beit, að þvo þvott í þvottahúsi en þannig var það.

Sunnudagur 13. júní:
Hrikaleg rólegheit, hjólatúr í safnaferð, ofur gaman. Í borgarhöllinni er búið að koma fyrir ýmsum söfnum um söguna og nútímann. Alls kyns söguþráður um grafir fornra manna, búið að flytja gömul kuml inn á safn, sagan um hvað innflytjendur komu með til landsins o.fl., rosalega skemmtilegt í gamalli höll eða kastala gamals konungs; ýmsir stílar, t.d. barok, rocoko og allt til nútímans, þ.e. hönnuðir nútímans sýna þarna það sem þeir búa til.

Mánudagur 14. júní:
Lögðum af stað norður sænsku Rívíeruna. Leiðindaveður, rigning og rok. Enduðum í Halmstad; Krono Camping, strönd, flottur staður. Kellingin (Sigga) með tak í baki; tók of mikið út úr hraðbankanum; hahahaha. Samt ekkert fyndið. Ég hef aldrei áður fengið verk í bak en oft tekið svona mikið og jafnvel meira út úr bankanum. Þetta er eitthvað óvænt sem hlýtur að jafna sig fljótlega.

Þriðjudagur 15. júní:
Rumskuðum eins og venjulega upp úr kl. 7. Úff, rigning og rok ; hausinn undir sæng og vöknuðum ekki almennilega fyrr en um kl. 10:30, en þá var líka ‘drive on James’ (eða sett í gírinn) til Gautaborgar; Liseberg Camping í Kärralund upp úr kl. 17, rólegt fram að háttatíma.

Miðvikudagur 16. júní:
Stefnum í Liseberg skemmtigarðinn; og afi og amma eða mamma og fóstri fara heim í dag ef að líkum lætur. Vonandi ná þau fluginu í tíma, Ingimar frændi Bigga sér um það. Frá klukkan 15 til klukkan 22 í Liseberg-garðinum; afrek út af fyrir sig. Garðurinn er fallegur og skemmtilegur, mikið af fallegum byggingum, gróðri o.fl. Einar naut sín vel í öllum tækjunum. Allir drulluþreyttir eftir daginn en ánægðir.

Fimmudagur 17. júní; þjóðhátíðardagur Íslendinga:
Farið frá Gautaborg um hádegi. Vorum löt og nenntum ekki á fætur, þ.e. nema Guddi. Hann vaknaði við fjölskylduhljóð eða óhljóð (eftir því hvernig á það er litið) úr næsta “húsi” um hálfáttaleytið og gat ekki sofið lengur fyrir samtölum, grenjum og öðrum hjóðum sem gjarna fylgir fjölskyldufólki með minni börn.
Leiðin liggur í átt til Örebro. Þar á að finna vatna- og skemmtigarð, eitthvað alveg svakalega spennandi og áhugavert. Sundlaugar, heitar og kaldar, rennibrautir, minigolf o.fl., Einar bíður eftir þessu og hinum á örugglega líka eftir að finnast gaman. Sundbolur allan daginn; annað verður ekki óhreint á meðan!! ;-)
Þar sem ekki er um að ræða hangikjöt í hátíðarmatinn þá var valinn næsti kostur sem mörgum þykir nú ekki verri, nautakjöt, entrécote, með bernaise, steiktum sveppum, rauðlauk og papriku og svo smá hrásalat.
Gott veður þennan dag, þó best undir kvöldið.

Hilsen fra Geiranger

2004-06-30T15:00:00.000Z

Tja, mar!
Nú er bara Internet á hverju tjaldstædi! Norsararnir svona tæknivæddir.
Nú eiga einhverjir von á póstkorti :-)
Loksins gott vedur!
Jamm, kvist á bílskúrinn, hmm, ætli thad verdi ekki ad vera efri hæd!!

Kvedja frá sígaunahjónunum og Einari, stødd í Geiranger í Norge.

GPRS virker ikke så godt!

2004-06-29T08:49:00.000Z

Afsakid rosalega mikid, en vid høfum ekki nad sambandi vid internetid med okkar tæknigræjum og internetkaffi ekki a hverju horni.
Nuna erum vid a tjaldstædi i Åndalsnes, Norge. Vedrid hefur ekki verid nogu gott, rigning og lagt hitastig, um 12-15 gradur.
Meira kemur seinna en kannski ekki fyrr en vid komum heim, thvi midur.

Heitt i Hamborg

2004-06-09T22:31:00.000Z

Sunnudagur: Nú er stórfjölskyldan stödd í Hamborg. Við komum hingað upp úr hádeginu. Hitinn þónokkur tuggugu og eitthvað gráður og sólskin. Heimilisbílnum eða ‘Stóra utanlands’ var lagt á húsbílastæði niður við höfn og síðan stormaði liðið, hver og einn á sínum tveimur jafnfljótum upp í bæ. Kvöldverður nálægt Ráðústorginu, þar sem búið var að fylla torgið, sem er þónokkuð stórt, með styttum af sama karlinum berandi tvær vatnsfötur, sína í hvorri hendi. Karlinn hafði sama lagið á öllum styttunum en enginn þeirra var eins á litinn eða með sama mynstrinu.

Mánudagur: Farið í hafnarrúnt með útsýnisbáti, (í alveg rosalegum hita það voru um 30 gráður við bílinn þegar við lögðum í’ann í morgun um kl. 10) og allir mörgþúsund-fermetrar Hamborgarhafnar skoðaðir, gámabryggjur og aðrar bryggjur, olíuhreinsun o.fl. Þetta er ótrúlega stórt svæði. Síðan gengum við um allan bæ, horft í glugga hjá Versace, Boss og fleirum frægum og líka öðrum minna frægum; en hvergi farið inn. Svo fórum við í mjög stóran lystigarð þar sem eru alls kyns blóm, tré og jurtir ásamt leiksvæði fyrir börn, kaffihús, fangelsi og fleira. Eftir níu tíma skoðunarferð þennan daginn komum við aftur í bílinn,’Stóra utanlands’, allir sælir en þreyttir og sofnuðu held ég bara vel við niðinn frá umferð bíla og lesta.

Þriðjudagur: Lagt af stað í norðurátt. Biggi og Ásta ætla að vera í Malmö á föstudag og við ælum að skoða Legoland áður en þau fara þangað. Komum við í húsbílabúð og matarstellið endurnýjað ásamt einhverju fleiru fyrir bílinn. Enduðum daginn á afskaplega huggulegu sveitatjaldstæði við vatn sem heitir Blistensee. Hér náðum við ekki að tengja okkur internetinu þannig að ekkert blogg var sett á síðuna góðu þetta kvöldið. Um nóttina hrukku svo allir upp af værum blundi við hellirigningu, þrumur og eldingar. Það voru nú meiri lætin. En þetta er náttúrulega stórkostlegt sjónarspil fyrir okkur Íslendingana sem sjáum aldrei eða heyrum svona læti í veðrinu þótt við hrökkvum ekki upp við rok og snjóbyl. En það er nú öðruvísi.

Miðvikudagur: Eftir morgunverð í miklum rólegheitum, þar sem var að sjálfsögðu boðið uppá nýbökuð rúnnstykki eins og svo oft í þessari ferð var lagt af stað í átt til landamæra Þýskalands og Danmerkur. Áætlunin hljóðar uppá að versla í landamærabúðunum, hitta hann Kurt í Süderlügum og enda í Vandel hjá Bjarna. Kurt er blessaður kallinn sem seldi okkur bílinn, Bjarni er sá sem aðstoðaði okkur í bílakaupunum. Bjarni á heima nokkurnveginn við hliðina á Legolandi þannig að það er mjög þægilegt að fá að vakna þar og geta tekið daginn snemma í Legolandinu. Sennilega missir Guddi af þessari ferð í Legoland því að flugurnar, þýsku, náðu að narta í hann í gær og í kvöld er Guddi með hendi á við boxhanska og fótlegg á við símastaur. Það er því nokkuð ljóst að hann hvílir sig á morgun.

Over and out í þetta sinn.
Sigga sígauni og fjölskylda.

Sjómannadagur á morgun!!

2004-06-05T20:38:00.000Z

Jæja gott fólk!

Maður er nú ekki sá duglegasti við bloggið, enda nóg annað að gera.

Í morgun vöknuðum við í Hollandi, í pínulitlum bæ sem heitir Midwolda. Vikrilega huggulegt tjaldstæði. Konan á tjaldstæðinu, annar eigendanna, var á leiðinni á árlegan markað í næsta þorpi til að selja reyktan urriða sem maðurinn hennar var búinn að ala og veiða og reykja. Einar og Birgir reyndu í morgun að veiða urriða á stöng, í tjörninni á svæðinu en höfðu ekki erindi sem erfiði, skildu öngulinn eftir í tjörninni. Eigendur tjaldstæðisins voru hin skemmtilegustu og var manni sko boðið í eldhús til að gera upp og þvílíkt. Þau hafa verið að skoða Ísland, eru með áhuga á að heimsækja það. Nú svo var þvegin þvottur, allir komust í sturtu, sem farið var að bíða eftir, þannig að allir fóru sáttir í háttinn, nýþvegnir, rakaðir og flottir.

Í nótt ætlum við að sofa á ‘stellplatz’ í pínulitlum bæ sem heitir Ditzum og er í Þýskalandi rétt austan við landamæri Hollands (engin sturta, ekkert klósett og enginn ruslagámur, en það er búið að finna bakaríið þannig að það er búið að redda heitum rúnnstykkjum með morgunmatnum í fyrramálið). Það er búið að skoða höfnina og ferjuna sem fer til Petkum, sem er þorpið norðan við fljótið Ems. Hér eru líka mikil mannvirki , lokur (slússur) sem passa það að ekki verði vart flóðs og fjöru í ám og skipaskurðum landsins. Svo er búið að skoða handavinnubúðirnar og viti menn í einni þeirra sat fullorðin maður og saumaði harðangurs-dúka. Flottur kall, sat og reykti sígarettur og það var greinilega langt síðan hann þvoði upp kaffibollann sinn, en útsamurinn var fallegur. Dagurinn var síðan endaður með þessum fínu þýsku svínasneiðum, steiktum á pönnu, og fréttum íslenska ríkisútvarpsins.

Veðrið, kapituli Íslendingsins, í dag var 20 til 25 gráður en vindur af hafi þónokkur, sumum okkar finnst þetta bara skítakuldi en mér er alltaf heitt!!! Ég skil bara ekkert í þessu.

Plan morgundagsins er að keyra til Hamborgar og vera þar næstu tvo daga.

Á morgun er sjómannadagur, til hamingju sjómenn með daginn!!!

Kveðja,
Familien Sigga og co.

Blogg nr. zwei

2004-06-03T19:57:00.000Z

Jæja, nú er gaman.
Var að frétta að Ollý systir fékk verðlaun í skólanum sínum. Innilega til hamingju systir mín.
Ég er búin að vera að reyna að finna einkunnirnar mínar á heimasíðu míns skóla; vantar eina. Glöð með allt nema eina einkunn ennþá. Toppaði ársreikninginn og ferðamálafræðina, get ekki verið annað en glöð með að gera best þar; 8. Klúðraði tölfræðinni fékk 7 en ekki 9 eins og stefnt var að. Ítalskan 10, ekki hægt að biðja um meira! Rekstrarhagfræði 7, meðaleinkunnin er 6.07 þannig að ég má vera glöð.

Hér er líka gaman. Við erum enn í Wilhelmshaven, búin að ganga fram og til baka á 'Keiser Wilhelms Brücke'. Búin að skoða stríðssögusafn með U-boot und alles. Fórum líka í sýndarveruleika´safn´ þar sem við upplifðum neðansjávarlífið, 100 m. mínus. Hákarlar, humar og svo hin ýmsu tæki og rannsóknir sem Þjóðverjar hafa notað til að skoða og rannsókna lífið neðansjávar. Mikil upplifun og afskaplega skemmtilegt.
Bráðum kemur helgi og okkur sýnist að hér verði hátíð með vatnasporti og gamni og gríni. Aldrei að vita nema dvölin verði framlengd. Við eigum eftir að skoða Lystigarðinn og Sjávardýrasafnið og eflaust margt fleira.
Meira seinna!!
Kveðja, Sigga og fjölskylda.

Fyrsta bloggið

2004-06-02T20:01:00.000Z

Halló allir!
Nú kemur önnur tilraun til að blogga hér á þessari síðu sem hún systir mín Ólina var svo hugulsöm að setja upp fyrir fjölskylduna mína. Fyrsta tilraun var í gær þá rofnaði þetta rándýra GPRS samband þegar ég var búin að semja smá texta, þá nennti ég ekki meir.
Nú erum við stödd í Wilhelmshaven, einni af borgum Þjóðverja. Við erum búin að ganga okkur hálfa leið upp að hnjám með því að skoða borgina. Á morgun á að fara og skoða söfn, t.d. kafbátasafn, sjávardýrasafn og svo er hér djúpsjávarhermir eða einhver sýndarveruleiki úr hafdjúpunum sem stendur til að athuga líka. Annars erum við búin að skoða kaviarverksmiðju í Cuxhaven og flugvéla-og sögusafn þar í nágrenni. Þar voru herflugvélar, þyrlur og fleira flott. Þar áður vorum við þrjár nætur í eyjunni Sylt sem er rétt sunnan við dönsku landamærin. Þangað eru bílar fluttir á lestarvagni. Maður bara keyrir bílinn uppá lestarvagn. drepur á bílvélinni, setur í handbremsu og horfir svo á landslagið út um gluggann á leiðinni sem tekur tja, ca. 30 mínútur.
Látum þetta duga í bili.
Bestu kveðjur frá okkur öllum, kátum.

Til Siggu og Gudda :)

2004-05-27T20:00:00.000Z

Blessuð,

Nú verið þið að taka við sko. Blogga alveg útí eitt. Er ekki alltaf þráðlaust net í bílnum?
Tíhí.